Shtëpia Studio Kadare në bashkëpunim me Agjensinë e Parqeve dhe Rekreacionit dhe Fondacioni Konrad Adenauer organizon aktivitetin ‘‘Lexo N’Park‘‘. Ky aktivitet lindi si një nevojë e shtuar për edukimin e fëmijëve nëpërmjet librit. Leximi në park është terapia më e mirë për fëmijët dhe jo vetëm. Ndaj kësaj herë natyra është kthyer në mikpritësen tonë më të mirë për të lexuar librat e ndryshëm të adaptuar për ta. Përveç leximit dhe diskutimeve për librin Shtëpia Studio Kadare synon që të pasurojë bibliotekat e shkollave nëpërmjet dhurimit të librave.
Që në fillesat e para të muzeut fëmijët dhe nxënësit kanë qënë vizitorët më të dashur të tij. Shtëpia Studio Kadare duke qënë i vetmi muze i librit ka tërhequr këtë grupmoshë duke i bërë ata vizitorët më të afërt të tij. Libri është miku më i mirë i vogëlushëve, gjithmonë ka qënë një urë ndërlidhëse me një botë tjetër që të ofron emocione dhe liri mendimesh dhe mpreh arsyetimin dhe zhvillon imagjinatën. Ky aktivitet ka në qëndër fëmijët dhe edukimin e tyre nëpërmjet librit. Ka si synim të sjellë fëmijët më pranë tij.
Në secilin takim ne trajtojmë libra të ndryshëm duke I përshtatur me moshën dhe preferencat e tyre. Pjesë e këtij projekti janë shkollat publike dhe ato jopublike. Në çdo takim përzgjidhet një shkollë e caktuar dhe sigurisht të ftuarit nuk mungojnë që të jenë pjesë e tij, jo vetëm shkrimtarë, por edhe përkthyes, apo sociologë. Të gjithë lexojmë fragmente nga libri, por përveç leximit të librit të përzgjedhur fëmijët dhe nxënësit shuajnë kuriozitetin e tyre përmes pyetjeve drejtuar shkrimtarëve të pranishëm apo shkëmbejnë me njëri-tjetrin mendime rreth temave të ndyrshme që trajton libri. Bashkëpunimi me shtëpinë botuese Living është mjaft frytdhënës pasi u janë dhuruar kopje të librave të ndryshëm biblotekave të shkollave dhe kupona me ulje çmimi nxënësve të pranishëm.
Ky program u hap me ‘’Anën nga Tirana’’, ‘’Një elefant Elegant’’, ‘’FjalëKuqe’’ ‘’Shtëpia e Gudulisur’’ të autores Rudina Cupi dhe ‘’Pricesha Argjiro’’ nga Ismail Kadare. Kemi njohur lexuesin e vogël me shkencëtaren e parë femër Sabiha Kasimati, ndaj kemi lexuar librin me ilustrime që I dedikohet pikërisht mikeshës së peshqëve dhe iktologes së njohur dhe të vetme shqiptare. Herë pas here kanë qënë prezent autorët e librave siç mund të përmendim autoren Rovena Rrozhani e librit për fëmijë ‘‘Fani në kërkim të Dritës’’. Me rastin e 1 qeshorit Ditës së Fëmijëve sëbashku me shkrimtaren Rita Petro zgjodhëm të rrëfejmë ‘’Legjenda dhe Vende Shqipëtare‘‘ duke zgjuar kuriozitet tek fëmijët për vendet dhe viset shqipëtare.
Përgjedhja e tyre nuk vjen e rastësishme, por duke synuar të prekim sadopak temat më delikate dhe më prezente në përditshmërinë e tyre. Me nxënësit e shkollës Faik Konica kemi biseduar rreth librit ‘’GirlBoss’’. Nuk druhemi nga temat delikate të drogës, tek libri ‘‘Ne Fëmijët e Kopshtit Zeoologjik të Berlinit’’ i cili u analizua nga psikologia Anisa Zace.
Vendndodhja e takimeve
Takimet me nxënësit dhe fëmijët janë organizuar në parqet e ndryshme të Tiranës. Duke dashur t’i sjellim sa më pranë natyrës kemi përzgjedhur hapësirat e gjelbëra të qytetit si Parku i Madh, Reja, e Parku Rinia.
